Među uhapšenima i tjelohranitelji albanskih političara

Regija 11. maj 201507:49 > 07:54
TANJUG/Zoran Žestić

Među uhapšenim vođama terorističke grupe, koja je izvela napad u Kumanovu, su i bivši tjelohranitelji albanskih političara sa Kosova i iz Makedonije, javili su makedonski mediji.

Makedonski mediji podsjećaju da su Sami Ukšini, poznat kao komandant Sokoli, Bef Rizaj, Dem Šehu i Muhamet Krasnići – komandant Mališeva, četvorica koja su se u subotu predala makedonskoj policiji poslije 16 sati borbe u Kumanovu.

Dem Šehu iz Dečana je učestvovao u ratu takozvane OVK na Kosovu, ali i u konfliktu 2001. godine u Makedoniji, navode mediji. Poslije rata u Makedoniji, bio je tijelohranitelj lidera Demokratske unije za integracije (DUI) Ali Ahmetija, a često je viđan i sa drugim funkcionerima ove partije.

Beg Rizaj je bio vojnik OVK u zoni Dukađin na Kosovu, a poslije rata na Kosovu bio je tjelohranitelj nekadašnjeg lidera OVK Ramuša Haradinaja, koji je predsjednik stranke Alijansa za budućnost Kosova.

Sami Ukšini – komandant Sokoli potiče iz porodice iz Morine kod Đakovice, a njegova porodica je bila baza OVK, OVPMB i OVK Makedonija, pišu makedonski mediji.

Muhamet Krasnići – komandant Mališeva je iz Mališeva na Kosovu. Bio je u OVK na Kosovu, a 2001. i u Makedoniji.