U derbiju 35. kola Serie A Inter je na Olimpicu uspio da savlada Lazio sa 2:1, a "nebesko plavima" je presudio njihov bivši igrač Hernanes koji je postigao oba gola za "neroazzure".

Lazio je na startu meča došao do vodstva, a strijelac je bio Antonio Candreva u 8. minutu posle asistencije Andersona. U 24. minutu Lazio je ostao sa desetoricom na terenu pošto je isključen Brazilac Mauricio, a Inter je do izjednačenja došao dva minuta kasnije preko Hernanesa.

U 61. minutu golman Lazija, Federico Marchetti, napravio je penal i dobio crveni karton, ali Icardi nije uspio da iskoristi jedanaesterac. Ipak, Inter je sa dva igrača više uspio da dođe do pobjede u finišu. U 84.minutu Hernanes je iskoristio proigravanje Kovačića i donio sva tri boda četi Roberta Mancinija. Inter je na ovaj način i sedmi meč u nizu neporažen.

Inter je sada sedmi sa 52 boda i može do mjesta koje vodi u Ligu Evrope, a Lazio ostaje treći sa 63 boda. Roma ima jedan više, a Napoli tri manje u borbi za mjesto u Ligi prvaka.