Baranin Dušan Novaković i Žarko Zenović iz Petrovca ulovili su mako ajkulu tri kilometra od obale, u blizini turističkog kompleksa Skočiđevojka.

Ova dugonosa riba, čije ime u Maori jeziku znači “ajkulin zub”, vrlo rijetko se nalazi u Jadranskom moru.

“Izvadili smo je na plutajući parangal, mamac je bila skuša. Bila je duga oko 120 centimetara i teška 23 kilograma”, rekao je Novaković lokalnim medijima.

Mako ajkula u prosjeku naraste oko tri metra dužine, naseljava sva svjetska mora, osim hladnih voda sjevera i juga, a važi za jednu od najbržih riba, što se pripisuje evoluciji, jer se hrani tunama i sabljarkama.